Eguraldi iragarpenak tarteko, antolatzaileek bertan behera utzi behar izan dute gaur (otsailak 14) eguerdirako aurreikusita zegoen mozorro desfilea. Eguneko ekitaldirik jendetsuena egin ez bada ere, egitarauari eusteko ahalegina egin dute. Hala, desfilearen ondoren egin ohi den photocall-a aterpean egin dute, udaletxe azpiko arkupeetan.
Udaleko iturriek jakinarazi dutenez, adin guztietako herritarrek parte hartu dute lehiaketan. Bertan bildu dira kuadrillak eta karrozak, euren mozorroak erakutsi eta argazkiak egiteko.
Guztira, hemezortzi taldek eman dute izena:
- Bederatzi talde mistoen kategorian.
- Talde bakarra 16 urtetik beherakoen mailan.
- Hiru 16 urtetik beherakoen taldekako mailan.
- Lau 16 urtetik gorako taldekako kategorian.
Irudimena protagonista
Eguraldi txarrak ez ditu kikildu debarrak; bustita amaitu badute ere, jai giroaz gozatzeko aukera izan dute.
Beste behin, irudimena izan da protagonista jantzietan eta karrozetan. Batzuek mozorro klasikoen alde egin dute, eta beste askok proposamen landuagoak plazaratu dituzte, hala nola: curling talde bat, telebistako Un, dos, tres saio ezagunaren parodia, Kalean Kantuz irudikatzen zuen kuadrilla, baita Stranger Things telesaileko eta E.T. filmeko pertsonaiak ere.