Ostolaza Sarien hirugarren ediziorako deialdia egin du Kultur Elkarteak, "udalerriko kultur jarduera aberasten laguntzen duten herritarren edo erakundeen lana aitortzeko eta aintzatesteko" helburuarekin. Aurreko urteetan bezalaxe, epaimahaiak lau sari banatuko ditu oraingoan ere –Sortzaileak, Dinamikak, Ezinbestekoak eta Hazia Saria–, eta horietarako hautagaiak edozein herritarrek proposatu ahal izango dituela gogorarazi dute.
Proposamenak maiatzaren 30a baino lehen aurkeztu beharko dira, Kultur Elkartean bertan –postontzian lagata– edo Internet bidez –labur.eus/ostolazasariak estekako formularioa beteta–.
Sari banaketa ekitaldia ekainaren 13an izango da, larunbatez, Kultur Elkarteak Bazkidearen Eguna ospatzeko antolatuko duen egitarauaren baitan.