Aurreko astean, ekainaren 25ean eta 26an, Gipuzkoako Foru Aldundiak bultzatutako Ongizatearen Plaza egitasmoa Debako Foruen plazan izan zen. Bi egunez, espazio hori herritarren topagune bihurtu zen, ongizate integralaren inguruko hausnarketa, elkarrizketa eta esperientzien trukea sustatzeko helburuarekin.
Egitarau zabalaren barruan hitzaldiak, tailerrak, mahai-inguruak eta solasaldi irekiak antolatu zituzten. Saio horietan, gaur egungo gizarteak mahai gainean dituen hainbat erronka jorratu zituzten; hala nola nahi ez diren bakardadeak, elikadura jasangarri eta osasuntsua, pantailen erabilera edo hizkuntzak nortasunean eta bizi-kalitatean duen eragina.
Balorazio positiboa
Behin ekimena amaituta, aldundiak balorazio positiboa egin du Debako geldialdiaren inguruan. Eider Mendoza diputatu nagusia oso pozik agertu da ekimenak herrian izan duen harrerarekin, eta eskerrak eman dizkie Foruen plazara hurbildutako guztiei, parte-hartzeagatik eta erakutsitako inplikazioagatik. Gainera, nabarmendu du ekimena "elkar entzun, hausnartu, iritziak partekatu eta gozatzeko" topagunea izan dela.
Diputatu nagusiaren iritziz, Debakoaren gisako topaketek argi utzi dute ongizatearekin lotutako gaiei buruz hitz egiteko beharra dagoela. "Beste behin ere ikusi dugu zein garrantzitsua den mundu ezegonkor eta azeleratu honetan norberaren bizitza-orekan eta ongizatean eragina duten gaiez hitz egitea”, adierazi du. Zentzu horretan, azpimarratu du egitasmoak "ondo egoteaz gain, ondo sentitzeko gakoak" partekatzeko aukera eman duela, eta herritarren eguneroko bizitzan eragina duten gaiak plazaren erdigunera ekartzea lortu duela.