24. Korrikaren sustatzaileek jakinarazi dutenez, egunotan egingo dituzte Deban eta Itziarren tokian tokiko Korrika Batzordeak eratzeko lehen batzarrak. Debako lehen bilera bihar (urtarrilak 28) izango da, 19:00etan, Kultur Elkarteko liburutegian. Itziarren, berriz, etzirako (urtarrilak 29) deitu dute, 19:00etan; Burugorri gainean izango da hitzordua. Deitzaileek gogorarazi dutenez, saioak irekiak izango dira. Herriko eragileak eta erakundetako ordezkariak gonbidatu dituzte parte hartzera, baita herritarrak ere.
Iragarri dutenez, AEK-k antolatzen duen euskararen aldeko ekimen erraldoiaren nondik norakoez jardungo dute tokian tokiko bileretan. Beste zenbait gairen artean, ibilbidea, lekuko eramateko erreserbak eta material salmenta izango dituzte hizpide. Horrez gain, Korrika Kulturaren agendarako ekimenen bat antolatu edota antolakuntzan lan egiteko prest dauden horien guztien ekarpenak entzuteko deitu dituzte hitzorduak.