Mutilen lehiari dagokionez, Zumaiako Pulpo kirol taldeko talde batek irabazi du txapelketa, hirugarren urtez jarraian. Aurtengo finalean Eibar Eskubaloia taldea izan zuten aurkari, eta zumaiarrak nagusitasunez gailendu ziren. Hamabi goleko errentaz, -20-8- joan ziren atsedenaldi luzera, eta bigarren zatian ez zuten pilatutako abantailari eusteko arazorik eduki. 33 eta 23 izan zen finaleko azken emaitza. Hirugarren eta laugarren postuak erabakitzeko lehian, Sanloko Urkunde taldeak eta Loiuko Urdanetak jokatu zuten elkarren aurka, eta bizkaitarrentzat iza zen garaipena, 22-15eko emaitzarekin (ikus partida Sanloren Youtubeko kanalean).
Errotaberri nagusi nesketan
Nesken arteko lehian erakustaldia eman zuen Ermuko Errotaberri taldeak. Finalean ez zioten aukerarik eman Iruñeako Anaitasuna taldeari, eta bizkaitarrak 31-10 gailendu ziren. Hirugarren posturako lehian, Pulpok 24-18 irabazi zion Sanloko Amaro Eraikuntzak taldeari. (ikus partida hemen)
Sanlo kirol taldean antolatzen duen txapelketan Gipuzkoa, Bizkaia eta Nafarroatik etorri ziren hamar kirol taldetako ordezkariak aritu ziren lehian, nesken zein mutilen hamasei talde guztira.