Merkatu plazaren eraikinean dagoen Transformazio Elektrikorako Zentroa lekuz aldatzeko lanak hasi zituzten martxo hasieran. Zulotzarra egin dute San Frantsizko iturriaren gainaldean, transformadorea bertan lurperatzeko.
Obren paretik igaro diren hainbat herritarren arreta bereganatu duena, baina, zuloan agertu diren azulejo txuriko hormek. Edade batetik aurrerako elgoibartarrentzat ez dago misteriorik, akorduan baitituzte leku horretan egon ziren komun publikoak. Nostalgiarako zioa ere izan da zenbaitentzat, oroimena freskatu eta garai bateko Elgoibar nolakoa zen gogora ekartzeko aukera eman baitie sareetan argitaratu duten komunen argazki zaharrak. Liburutegian gordeta dute Labordeta Fotostudio zenak ateratako argazkia. Komun publikoetarako sarrera ikus daiteke zuri-beltzeko argazkian, eta atzeko planoan San Frantzisko iturria, lehenagoko merkatu plaza eta Altzolarren dorretxea. Bi sarbide zituzten komunek, gizonezkoentzat bata eta emakumezkoentzat bestea. Dutxak ere bazituztela aipatu dute batzuek. Komunez gogoratzean, Kalebarrenen (Nafarroa plaza izena zuen lehenago) zegoen gasolindegia ere ekarri dute gogora edadetuenek (beheko irudian).
