Joan den zapatuan jokatu zuten Gurutzeaga txirrindularitza klubak antolatzen duen 82 kilometroko proba. Besa-Geminis taldeko Manex Larrañagak (Aretxabaleta, 2008) gurutzatu zuen helmuga marra lehen postuan, esprintean gailendu eta gero. Aiur Ugartemendia (Ipar Maquina-Dimaq) sailkatu zen bigarren postuan, eta Axular Aldazabal (Cafe Dromedario-Flotamet) hirugarrengoan. Denbora bera markatu zieten hirurei: 2:07:44. Honakoa denboraldiko bigarren garaipena da Larrañagarentzat, Urkola-Oiarzabal Memoriala irabazi baitzuen, maiatzean, Anoetan.
Larrañagaren garaipenaz gainera, Elgoibarko Besa-Geminis taldeak lehen postua eskuratu zuen taldekako sailkapenean. Elgoibarko taldeak 25 segundoko aldea atera zion Loiumat Punta Galea taldeari. Sari banaketa ekitaldian, sarituek Igor Arrieta, UAE Team Emirates taldeko txirrindulariaren eskutik jaso zituzten sariak, Zestoako bizilaguna baita Uharte-Arakilgo txirrindularia..
Argazki gehiago Zestoako Danbolin toki komunikabidean.
