Arnasberrituko bazen euskarak, administrazioaren laguntzaz gain, herritarren eguneroko bulkada behar zituela uste zuen, eta horixe izan da Garmendia bizialdian ibili den leku guztietan: euskararen aldeko hauspoa. Euskaltzale konprometitua eta militante aktiboa izan da, eta osasunak laga dion artean gorputz-arima jardun da Elgoibarren euskararen alde lanean. 1973an, 22 urterekin, maisu hasi zen Elgoibar Ikastolan, Hezkuntza sistemak euskaldunen eskuetan behar zuela sinetsita, eta hiru urte geroago, Mari Juli Conde ikastolako andereñoarekin ezkondu zen. Orduko beste irakasle askok bezala, konta ezin beste ordu eman zituen testugintzan eta liburugintzan ere, ikastolan lehenengo eta Elgoibar BH institutuan gero. 1982an hasi zen institutuan, euskarako irakasle, irakasle agregatu gisa, eta Euskara Mintegiko kide eta Institutuko zuzendari ere izan zen hainbat urtez.
Elgoibarko Izarraren gau eskolak
Ikastolan maisu izan zen garaian, 80ko hamarkadan, Elgoibarko Izarraren gau-eskoletan ere jardun zen irakasle, Andres Alberdik eskatuta. "Kontua da euskararen ezagutza lantzen genuela ikastolan, baina herrian ez genuela euskararen aldeko kontzientziarik ikusten. Horregatik, batzorde bat osatu genuen kontzientziazioa lantzeko eta euskararen erabilera bultzatzeko", kontatua du Elgoibarko Izarraren Izarren hautsa 40 urtean libururako Imanol Larrañagak egindako elkarrizketan. Hain justu, Garmendiak berak eskatuta hasi zen Elgoibarko Izarran lanean Larrañaga 1990eko udazkenean. Urte hartan, elkarteko zenbait bazkidek elkartea bertan behera lagatzea proposatu zuten Batzar Orokorrean, elkartearen urteko jardunari "oso pobrea" iritzita. Baina kontra agertu zen Garmendia, beste bizpahiru bazkiderekin batera. Hala, 1990eko udazkenean, bigarren etapari ekin zion Elgoibarko Izarrak, eta bi etapen arteko zubia izan zen Garmendia. Elkarteak aurrera egiteko, dedikazio profesionala ezinbestekoa zela uste izan zuten elkarteari eutsi behar zitzaiola erabaki zuten haiek, eta formula berria proposatu zuten, lan profesionala eta militantea uztartzen zituena.
Osasunez makal eman ditu Garmendiak azken urteak, baina ahal izan duen bitartean, Elgoibarko Izarraren orbitan mugitu da, herritartasuna hizkuntzarekin lotzeko ahaleginean, aberritzat euskara zuela.