Gaur, 16:00etan, Oilarraren jokoarekin hasiko dute martitzenera bitarteko aratusteen egitaraua. Aurten, San Lorenzo eskolako irakasleek gidatuko dute lehia, baina beti bezala, ikastetxe guztietako ikasleek hartuko dute parte. Zozketaz aukeratuko dira eta, makila eskuan, begiak estalita eta lagunen argibideak jarraituz, oilarraren kutxa ukitzen saiatuko dira. Irabazleek garaikurra eta herriko dendetan liburuak eta eskolako materiala erosteko bonuak jasoko dituzte. Ondoren, Xaiborren DJ festan dantzan eta kantuan aritzeko aukera izango dute, 17:30etatik aurrera, plazan. Bukatzeko, Ermuan Kantuanen saioa egingo dute 19:00etan, plazatik hasita. Eguenaren izenari jarraituz, dresscode-a jartzea pentsatu dute Gazte Asanbladakoek, eta zuri koloreko mozorroak janzteko proposamena bota diete herritarrei. Egunean bertan, Ermuan Kantuanen kantu liburuak salgai jarriko ditu Euskal Birusak, 6 euroko prezioan (5 euroan bazkideentzat).
Oilarraren atzetik, Hartza
Bihar, barikua, Txindurrikoek Urkora igo eta kobazulotik aterako dute hartza. 18:30ean pregoia botako dute udaletxetik eta kantu-jirari ekingo diote. Aurten, San Lorenzo eskolako umeak arduratuko dira piztia zaintzeaz, ibilbidean zehar ihes egin ez dezan.