Udaletik azaldu dutenez, hileroko ohiko azterketan zaratak antzeman dituzte kontrapisuaren polean eta kabinako txasisean. Horregatik, akats hauek konpontzeko programatutako geldialdia egingo dute martxoaren 9tik 10era bitartean, "matxura handiagoak saihesteko eta herritarren segurtasuna bermatzeko". Aurreikusitako lanen artean daude kaltetutako polea ordezkatzea eta txasisaren gidak behar diren puntuetan doitzea.
Bi hilabeteko geldialdia
Duela gutxi, igogailu bera luzaroan egon zen geldirik. Abenduaren 4az geroztik zazpi aste inguru zerbitzuz kanpo egon ondoren, urtarrilaren amaieran jarri zuten berriro martxan. Orduan, kableak poleatik askatuta zeudela atzeman zuten, eta segurtasun arrazoiengatik gelditzea erabaki zuten. Konponketak atzeratu egin ziren, besteak beste, igogailuen mantentze-lanen ardura enpresaz aldatu zelako —TKEtik Oronara—, eta beharrezko piezak eta teknikari espezializatuak lortzeko zailtasunak izan zituztelako.
