Martxak euskaraz bizitzeko baldintzak eratzeko ezinbestekoak diren hiru oinarri ordezkatuko ditu. Bat, ofizialtasun osoa eskatuko duen zutabea: euskararen normalizazioan aurrera bermez egiteko ezinbestekoa da euskara ofiziala izatea Euskal Herri osoan, gaztelaniaren eta frantsesaren pare, bestelako baldintza murriztailerik gabe. Bi, hizkuntza-politiketan eman beharreko jauzia aldarrikatuko duena: euskarak etorkizunik izango badu eta mundu aldaketa hauetara denetara egokituko bada, premiazkoa da paradigma aldaketa bat gertatzea hizkuntza-politiketan, eta euskararen ezagutza orokortzeko eta normaltasunez erabili ahal izateko baldintza errealak sortzea. Hiru, euskaltzaletasuna: herritarron ardura eta eginkizuna azpimarratu ez ezik, balioetsi egin nahi da zutabe horren bidez.
Euskarak aurrera egingo badu, herritarron ekarpen eta ekinari esker izango da, beste garai ilun batzuetan bezala, euskaltzaleon ekimen antolatuari esker! Apuntatu agendan, hozkailuko atean, mugikorrean... ekainaren 13a. Izan dadila Iruñea Euskal Herri osoko euskaltzaleen bilgune erraldoia!
A.I.