Eduki hau partekatzeko esteka arbelera kopiatu da.
Toletxegainen hartzen dut trena astero, Donostiara joateko. Obrak egin dituzte, eta oso txukun geratu da geltokia, baina jarlekuak falta dira. Gazteak lurrean eserita egoten dira trenaren zain, baina adin bat daukagunok ezin dugu horrelakorik egin, eta jarlekuak behar ditugu. Telefonoz deitu nuen ETSra, Toletxegainen ez baitago bulegorik. Esan zidaten idatziz bidali behar nuela erreklamazioa, eta halaxe egin nuen. Amaran jaitsi nintzenean, hango bulegoan bete nuen erreklamazio-orria: Toletxegainerako zakarrontzia eta jarlekuak eskatu nituen.
Iritsi zait ETSren erantzuna: zakarrontzia jarriko omen dute –dagoeneko jarrita dago–, baina jarlekuak ezingo omen dituzte jarri, geralekua estuegia delako, eta erabiltzaileen segurtasuna bermatzea delako haien lehentasuna.
Ez dakit araudia aldatu den edo zer. Dakidana da geraleku zaharrean bazeudela jarlekuak, eta bistara, behintzat, egungo geltokiak ez duela lehengoa baino estuagoa ematen. Nik ez dakit zer gehiago egin daitekeen, baina argi daukat adinekoentzako behar-beharrezkoak direla jarlekuak, trenaren zain egoteko.
