Haurra nintzela, eskolako goizean goizeko kalejiran parte hartzen nuen, musika eskolatik ere kalera ateratzen ginen eta auditoriumean kontzertuak ematen genituen. Orain ere, ikasleekin batera emanaldiak prestatzen jarraitzen dut. Udal Musika Bandak mimo handiz prestatutako kontzertua disfrutatzeko aukera izango dut, baita ondoren etorriko den bazkaria ere –eta gero, gerokoak–.
Egun hau ospatzearen zergatiari ez diot inoiz buelta askorik eman. Hala ere, kuriositateak jota, Santa Zezilia musikarien patroia zergatik den ikertzen ibili naiz iritzi-artikulu hau idazten hasi aurretik. Barkatuko diozue nire kristau jakintzarik ezari, baina, oso-oso labur esanda, Zezilia, Erromako familia noble batekoa, kristau bihurtu zelarik martirizatu egin zuten. Bizirik zela Jesusi abesten omen zion, eta diote bertatik datorrela musikarekiko lotura hori. Gaur egun, santuen izenak erabiltzen jarraitzen dugu, baina noiz arte? Ez dakit zuei, baina niri azaroaren 22a, Musikarien Eguna a secas, agian, gehiago gustatzen zait.