Hala ere, benetan kezkagarria dena ez da gomendio automatizatu hauek noizean behin huts egitea. Kezkagarriena da guk hori horren lasai onartzea. Gure eguneroko erabakiak –txikiak diruditen horiek ere– gero eta gehiago gailu digitalen esku uzten baditugu, ez al gara pixkanaka geure irizpidea galtzen ari? Eta gidari bihurtzen badira, nor arduratzen da behar bezala hezteaz?
Nor ari da erabakitzen zer den desiragarria eta zer baztergarria? Nork bermatzen digu historiaren alde onean jarraitzen dugula? Horregatik, ezin gara despistatu: gaur egun, despistatzea erraza bezain arriskutsua da.
Nik oraindik sinetsi nahi dut etorkizuna ez dutela algoritmoek bakarrik erabakiko. Klik bakarrean eta baldintzak irakurri gabe ez diegula makinei boterea emango, ezta? Geure erabakiak hartzeko askatasunari eutsiko diogula. Tira, robota oraindik ez dut behar, baina txanpiñoi itxurako lanpara hori… agian, oraingoan, asmatu egin dute.