Debako Udal Euskaltegiak 2026-2027 ikasturterako matrikula epea zabaldu du, eta irailaren 1etik 23ra egongo da zabalik. Ikastaroak urrian hasiko dira eta ikasturte osoan zehar garatuko dira, 2027ko ekainera arte.
Eskaintzak A1, A2, B1, B2, C1 eta C2 mailak biltzen ditu. Aurrez aurreko ikastaroak astean bi, hiru edo lau egunetan egingo dira, mailaren arabera, eta autoikaskuntzako modalitatea ere eskainiko da. Izen-emate aldian pertsona bakoitzaren beharrak hartuko dira kontuan, maila, ikastaro mota, egunak eta ordutegiak zehazteko, eta taldeak irailaren amaieran osatuko dira.
Ikastaroak euskara ikasten hasi nahi duten pertsonei zein beren ezagutzak hobetu edo azterketa eta titulazio ofizialak prestatu nahi dituztenei zuzenduta daude. Eskaintza 16 urtetik gorakoentzat da.
Langabeek, jubilatuek, ikasleek eta gurasoek matrikularen prezioan %50eko murrizketa izan dezakete. Era berean, ikasturtea amaitzean, ezarritako baldintzak betetzen dituzten ikasleentzako bekak aurreikusten dira.
Gainera, Eusko Jaurlaritzak 2026-2027 ikasturterako Euskara Bonua mantentzen du; horren bidez, 120 euroko ordainketa bakarra eginda, lau urtera arteko ikasketa-ibilbidea hasi ahal izango da. Halaber, 16 eta 18 urte bitarteko gazteentzat C1 maila ikasteko laguntza espezifiko bat ere badago.
Debako Udal Euskaltegia Ifar kalea, 12 helbidean dago, eta irailean 11:00etatik 18:00etara, etenik gabe, ematen du arreta. Informazioa eskatzeko edo izena emateko, 943 192 236 telefonora deitu edo udaleuskaltegia.deba@debabe.eus helbidera idatzi daiteke.
Gurasoentzako euskara ikastaroak
Euskaltegiak 0 eta 12 urte bitarteko seme-alabak dituzten gurasoentzako proposamen berezi bat ere eskaintzen du, haien behar eta ordutegietara egokitutako ikastaroekin.
Helburua euskara ikastea edo hobetzea erraztea da, bai oinarrizko ulermena eskuratzeko, bai ahozko eta idatzizko adierazpena hobetzeko, eta baita seme-alabei eskolako zereginetan laguntzeko ere. Ordutegia parte-hartzaileen beharren arabera zehaztuko da.
Gainera, Udalak matrikularen erdia ordainduko die baldintzak betetzen dituzten gurasoei, hasieratik.
Ikastaro hauetan izena emateko epea irailaren 25era arte egongo da zabalik.
AISA programa etorkinentzat
AISA programak beste herrialde batzuetatik etorritako pertsonei zuzendutako euskara hastapeneko ikastaroak eskaintzen ditu, hizkuntzarekin lehen harremana izan dezaten.
60 orduko ikastaroak dira, eta eguneroko egoerekin lotutako oinarrizko hiztegia eta ulermena lantzen dira, besteak beste agurrak, familia, eskola, garraioa edo merkatua. Ordutegia interesdunen beharretara egokituko da.
Baldintzak betetzen badira, Udalak matrikularen kostua aurreratuko du eta, ikasleek aprobetxamendu ona izanez gero, ikastaroa doakoa izango da.
Izen-ematea irailaren 25era arte egongo da zabalik. Informazio gehiago nahi izanez gero, Udaleko Euskara Zerbitzura ere jo daiteke.