Joan den asteko barikuan, AD Mallabia FTk antolatutako laugarren petanka txapelketa jokatu zen pilotalekuan. Hamasei herritar aritu ziren lehian, eta, azkenean, Koldo Zabala gailendu zen Enrike Prolen kontrako finalean.
Play-back mozorro lehiaketari dagokionez, 12 urtez azpikoen kategorian Lau Argi taldeak bigarren saria irabazi zuen, eta herriko dendetan erabiltzeko 30 euroko bonoa jaso zuten, Betagarriren "Zorion Argiak" kantari koreografia ederra asmatuta.
Baina 1,2,3 Mallabi taldearen suak piztu zuen pilotalekua, eta eurek lortu zuten lehen postua eta 60 euroko bonoa.
Nagusien kategorian, bakarkako zein binakako kategorian, Mallabiko Ostrukek lortu zuten bigarren postua eta 50 euroko txekea, herritarrak barrez leherrarazita etxean egindako mozorro originalekin eta eskainitako ikuskizun umoretsuarekin.
Rumi izan zen ordea kategoriako irabazlea eta 100 euroko txekea jaso zuen, Mallabiko pilotaleku erdian, bakarka, goi-mailako artista baten pareko kantu eta dantza erakustaldia egitearren.
Taldekako kategorian, Mendiko Mari eta Errekakuek bigarren postua eta 100 euroko txekea lortu zuten, Maria del Monteren "A la sombra de los pinos" eta Los del Ríoren "Macarena" kantuen remixarekin pilotaleku osoa dantzan jarrita.
Bukatzeko, taldekako garailea "Las del arcen iluminao" kuadrilla izan zen, eta 200 euroko txekea jaso zuten, Cadizko txirigota estiloan interpretatutako V16 balizaren inguruko kantu umoretsuarekin.
Etxeko arropa zaharrekin egindako mozorro onenaren saria, 60 euroko txekea, Ismael Praderak irabazi zuen, gaztetxoen kategoriara aurkeztutako 1,2,3 Mallabi taldea bezala jantzita.
Play-back mozorro lehiaketara aurkeztutako partaide denen koreografiak osorik ikusteko egin klik hemen.
