Ez zuten Buruarinak tailerrekoek Mendarora etortzen ziren estreinako aldia. Aurrez ere etorriak dira Ludotekako arduradunek eta Arno guraso elkartekoek gonbidatuta, eta atzoko tailerra In Leike kultur elkarteak antolatu zuen. Frontoian egin zuten tailerra, eta eskulanerako abilak direla erakutsi zuten haurrek zein helduek. 17:00etarako mahaiak prest zituzten antolatzaileek, eta mahai bakoitzaren gainean, lanerako behar zuten material guztia utzia zieten prest-prest Buruarinak enpresakoek. Gurasoek lagunduta, dozena erdi bat lamia, lauzpabost Tartalo, beste hainbeste deabru beltz, intxisu beltzak eta sorginak sortu zituzten haurrek, eskulanerako eta sormenerako talentu handia erakutsita. Bukaeran, talde argazkia atera zuten.