TAF kuadrillak irabazi zuen Kuadrillen Eguneko playback-a eta haientzat izan zen eguneko hiru sariketen emaitzaren batura kontuan hartuz Udalak banatu ohi duen sari nagusia ere, 300 euroko txekea. Bigarren saria, berriz, 200 euroko txekea, Gaztiak taldekoek irabazi zuten, 14-15 urteko nerabe kuadrillak, eta Randa taldekoentzat izan zen hirugarren saria, 100 euroko txekea. Jokoan ziren 90 puntutatik 81,3 eskuratu zituen TAF kuadrillak; 75,2 Gaztiak kuadrillakoek eta 73,2 Randa izeneko kuadrillakoek. Guztira zazpi kuadrilla izan ziren eguneko hiru sariketetan parte hartu zutenak, eta ondorioz sari nagusiak lortzeko jokoan sartu zirenak. Hori baitzen baldintza: paella lehiaketan ez ezik, txapel originalenaren sariketan eta gaueko playback lehiaketan ere parte hartzea. Hona hemen emaitza guztiak.
PAELLA LEHIAKETA
36 kuadrillak parte hartu zuten paella lehiaketan eta haietako 32k aurkeztu zituzten lehiaketarako. Epaimahaiaren ustez, TAF kuadrillakoena izan zen denetan onena. 30 puntutik 25, 3 eskuratu zituzten. Bigarren paellarik onena Sua eta Arroza kuadrillakoek kozinatutakoa izan zen, 23,6 punturekin, eta hirugarren paellarik onena aukeratzeko orduan berdinketa gertatu zen, 22,9 puntu eskuratu baitzituzten Beti Goguakin eta Carabam kuadrillek.
TXAPEL ORIGINALENAREN SARIKETA
Herri-bazkarirako izena emandako 36 kuadrilletatik hogeik parte hartu zuten txapel originalenaren sariketan, eta epaimahaiaren gusturako, Lokalekuak kuadrillarenak izan ziren denetan dotoreenak. Mendaro gai hartuta sortu zituzten txapelak, denak ezberdinak. Denetan ikusgarriena, seguruena, Santa Ana ermitaren trazara sortutakoa izan zen, Egoitz Horrillok egindakoa. Baina motibo denak ziren bereziak, eta denek merezi dute aipamena: Mendaroko errotondak, Katasorginak, Erraldoi eta Buruhandien konpartsak, Mendaroko txokolateek, Munlet musika herriko taldeak, Arrats tabernak, Kilimon futbol taldearen omenez sortutakoak.... Jokoan zeuden hogei puntuetatik hogei eskuratu zituzten. Bigarren txapelik onena, berriz, arrautza frijitu bat izan zen, Gaztiak kuadrillakoek Goma Evarekin sortutakoa. Hogeita bost txapel sortu zituzten, kuadrillakide bakoitzak berea, eta dotore asko agertu ziren bazkaritara denak, haiek jantzita. 19 puntu batu zituzten Gaztiak taldekoek. Hirugarren txapelik onena, berriz, Beti Goguakin kuadrillakoek sortutakoa izan zen. Hauek ere arrautzak eta txitak eraman zituzten lastoz apaindutako txapelera. Hogei puntutatik 18 eskuratu zituzten.
PLAYBACK LEHIAKETA
TAF kuadrillak irabazi zuen playback lehiaketa, Zumba koreografiarekin. Jokoan ziren 40 puntutik 39 eskuratu zituzten. Bigarren playbackik onena Randa taldearena izan zen, 38 punturekin, eta hirugarren onena, 850 kuadrillarena.
EMAITZA GUZTIAK. (Beltzez hiru jokoetan parte hartu zuten kuadrillak)
|