Errekalde 10eko etxea hondamen egoeran dagoela-eta, datozen asteotan bota egingo dute. Construcciones Echaide enpresak egingo ditu eraiste-lanak, 53.111,4 euroko aurrekontuarekin. Aurreikuspena da hilabetean bukatzea.
Aldaketak
Lanak egin ahal izateko, herriko zirkulazioa egokitu egingo dute, astelehenetik bertatik. Honako aldaketak ezarriko dituzte:
- Atxuri, Errabal eta Baltegieta kaleetara joateko Zubi Nagusitik joan beharko da. Halaber, Atxuri eta Errabal kaleek bi norabideko zirkulazioa izango dute.
- Erdigunea zirkulaziorako zabalik egongo da.
- Ezozibide-Ola-Ezozibide inguruko zirkulazioa semaforo bitartez bideratuko dute.
- Pesa-Lurraldebusen autobus geltokiak Estaziñoan zein Ezozibide 16an egokituko dituzte.
- Mendarorako autobus geltokiak, berriz, Sagar-Errekan, Ezozibiden, Estaziñoan eta Olako zubian izango dira.