Atzo, pentsio publiko duinen aldeko elkarretaratean, egueneko manifestazioa izan zuten hizpide nagusi. LGSren eta gutxieneko soldataren arteko parekidetasuna bermatzeko osagarritasuna aldarrikatuko dute Gasteizen, pentsiodunen mugimenduak deituta, eta, Soraluzetik ere bertara joateko deia egin zuten.
Koefiziente murriztaileak kentzeko
Horrez aparte, atzoko elkarretaratzean, koefiziente murriztaileak ere barbegai izan zituzten. Haiek ezabatzeko Diputatuen Kongresuan azaroan mozio bitartez egindako eskaera berretsi zuten atzo. Lege-erreforma eskatzen zuten kentzeko koefiziente-murriztaileak "egungo erretiroan edo erretiroa hartzen dutenean 40 urtez kotizatu dutenei”.
Argudiatu zutenez badaude horretarako baliabideak: “Gizarte Segurantza eta Migrazio Ministerioak argitaratu duen txosten baten arabera, Gizarte Segurantzak 3.172 milioi euro baino gehiagoko superabita du, kuoten % 7,8 gehiago ordaindu ostean. Horrez gain, Gizarte Segurantzaren Erreserba Funtsa 2026an 14.000 milioi eurora iritsiko dela ere iragarri dute; horrek iradokitzen du badaudela baliabideak koefiziente murriztaile horiek ezabatzeko”.
Gauzak horrela izan arren, jakinarazi zuten agintariek "ez dutela inolako seinalerik eman koefiziente murriztaileak ezabatuko dituen legea garatzeko" eta hori ikusita, Podemos, EH Bildu, ERC, Junts eta BNG alderdiek informazioa eskatu dutela neurri horien izapidetze-faseari buruz.
Azkenik, aurtengo errenta aitorpena dela-eta, ohartarazi zuten urtarrila eta ekaina bitartean, 14.000 € eta 20.000 € arteko lan etekin gordinak dituztenei PFEZaren atxikipenak aplikatu zitzaizkiela. Eta haiek atxikitako kopuruak berreskuratzeko, errenta aitorpena aurkeztu beharko dutela.