“Parajea zoragarria da eta eguraldiak ere zaindu gaitu, haize fina bai, baina eguzki ederrak ere egin digu harrera. Harrera gozoa egin digu LuisJak; soraluzetarra izanda, herrikideak ikusteko eta agurtzeko pozaz.
Inguruko mahastiak eta sagastiak erakutsi ondoren, txakolina ekoizteko jarraitzen den prozesua azaldu digu, horretara bideratuta dauzkan ekipazioa eta instalazioetan bertan. Jakin ahal izan dugu txakolina egiteko prozesuan, zein garrantzitsua diren mahats mota aukeratzea, eguraldia, zoru mota eta haren ezaugarriak, eta aspektu tekniko interesante ugari. Hori guztia, kalitate handiko txakolin ekologikoa lortu ahal izateko.
Ikasi bakarrik ez baina, bukaeran probatu ahal izan ditugu ekoizten dituen txakolin horietako batzuk, prestatu digun hamaiketako gozo bati laguntzeko”.
Datorren astean hitzordu bikoitza
Bestalde, datorren astean bi hitzordu izango dituzte jendartEKIN ekimenaren eskutik: astelehenean, Teknologia tailerra izango da Nikolas Morilloren eskutik. 10:00etan hasiko da.
Eguaztenean, berriz, Haurren eskubideak hitzaldia eskainiko du UNICEF fondoaren Nafarroako presidente Maider Gabilondo soraluzetarrak. Hori ere 10:00etan hasiko da.