Hizkuntza eta jatorri saltsa handia egon da egunotan Mintxetako futbol zelaian. Donosti Cup txapelketako partidak hartu dituen gainerako futbol zelaietan gertatzen ari denaren erakusgarria izan da. Gipuzkoa, Nafarroa, Bizkaia eta Ipar Euskal Herrian banatutako 60 zelai erabili dituzte programatutako 2.250 partidak jokatzeko, tartean Debabarrenekoak (Mintxeta, Unbe eta SD Eibarren kirol hiria).
Irudietan ostegunean jokatu zituzten bi partida: Donostiako Ostadar eta Kataluniako Set 11Sports taldeen arteko lehia; eta, Arrasateko Mondragon eta AEBko Belmont United Inter Blue taldeen artekoa.
NY Empire talde amerikarrak, Kanarietako CD Tinajok, Anoetako Herri Eskolak eta Madrileko AR Javi Torres taldeek lortu zuten final zortzirenetako sailkatzea Mintxetan.