Nire egunerokotasuna azkarra eta aldakorra da, hein handi batean. Elementu ezberdin askok hartzen dute parte bertan, munduak eskatzen digun erritmora egokituz. Kurtso hasierek izan ohi duten martxa frenetikoa kontuan hartuta, ez da
harritzekoa, gainera. Etxebizitzaren eta bizitza duinen aldeko mugimenduak ere zeharo astindu du ingurua, orain arte askorentzat begi-bistakoa izan ez dena erdigunera bistaratuz.
Denbora honetan guztian isil-isilik egon dena eta poliki-poliki aldatzen joan dena, ordea, gure inguru naturala izan da. Mendira begiratu eta zelaiak lehor, errekak urik gabe, sagarrondoak pitzatuta eta hautsita, behiak jandako belarraren gainean ez dagoen jana bilatu nahian… ikusi ditut. Interesgarria da bien arteko konparaketa: gizakion mundu azkar eta zalapartatsua; naturaren mundu geldo eta isila. Biak ala biak, aldakorrak. Biak zaindu beharrekoak. Biak negozioetatik at mantendu beharrekoak. Abestiak dioen bezala: Ezin da ta erosi salgai eztagoena, ezin da ta erosi guztiona dena.